ماكل من يركب الخيل خيال

ماكل من يركب الخيل خيال .......................... ولا كل خيل تعجبك هي اصيله

ولا كل من يعجبك هرجه برجال ....................بعض العرب ملسون وايده بخيله

الكل يلبس ثوب وشماغ وعقال ...................وعند اللزوم افعالهم هي قليله

الرجل تثبت له اقاويل بافعال ...................... لاقال شىء ونفذه هو دليله

والرجل لاشفته مع القيل والقال ................. ابعد عنه هذا صفاته عليله

والكذب خله عنك مافاد لو طال .................... قول الصدق ياصاح غنم وجميله

واللي شراك اشريه لو كان بالمال................خلك معه وان مال ... دور بديله

واصبر ترى الدنيا تبدل بها احوال ...................وما كل شيء صافي تشوفه تجيله

وبعد الكدر تشرب صافا عذب وزلال................هذا الزمن فيه استقامه وميله

وصاحب خليل لو جفا الوقت مامال.................ترى الرجل يعرف بقيمه خليله

واقفل على سرك بكتمان واقفال..................بعض العرب يسمع وينوي بحيله

وخلك امين اذا توليت الاعمال.....................من خان في يوم الحشر ياحليله

خل التواضع فيك واضح بالافعال................. ترى الكبر يردي بيوم وليله

ولا تحسد الي عنده اموال وعيال................وش ينفعك لو كان حسدك يزيله

وخلك رزين ترى المخفه للاطفال ................واصفح عن المخطي لو زاد قيله

وصل الفروض ولا تنسيك الاشعال............ محدن في الدنيا درى وش بقي له

وزور الاقارب للرحم كون وصال...................وخلك عظيم الشان وسط القبيله